
第一世噶玛巴教言集1KM29རིན་པོ་ཆེའི་ཐུགས་དམ་ཕག་མོ་ཞལ་བཞི་མ་ཞེས་བྱ་བ་བཞུགས་སོ། །
1-2-185a
༄༅། །རིན་པོ་ཆེའི་ཐུགས་དམ་ཕག་མོ་ཞལ་བཞི་མ་ཞེས་བྱ་བ་བཞུགས་སོ། །
༄། །ཇོ་མོ་ཞལ་བཞི་མའི་སྒྲུབ་ཐབས།
༄༅། །རིན་པོ་ཆེའི་ཐུགས་དམ་ཕག་མོ་ཞལ་བཞི་མ་ཞེས་བྱ་བ་བཞུགས་སོ། །གུ་རུ་ན་མོ། སྐུ་གསུམ་ལྷུན་གྲུབ་རང་བཞིན་གཉུག་མའི་ངང་། །དངོས་གྲུབ་མཆོག་བརྙེས་རྗེ་བཙུན་བླ་མ་དང་། །ཐབས་དང་ཤེས་རབ་གཉིས་མེད་ཟུང་འཇུག་པའི། །ཕག་མོ་ལ་སོགས་མཁའ་འགྲོ་རྣམས་ལ་འདུད། །རྒྱུད་གསུམ་ལ་བརྟེན་ཇོ་མོ་ཞལ་བཞི་མའི། །མངོན་རྟོགས་ལས་ཚོགས་བཅས་རྣམས་གསལ་བར་བྲི། །རྡོ་རྗེ་རྣལ་འབྱོར་མ་བསྒོམ་པར་འདོད་པས། གནས་ཁང་ཡིད་དང་འཐུན་པར་སྟན་བདེ་བ་ལ་སྐྱིལ་མོ་དཀྲུང་བཅས་ཏེ། བྱང་ཆུབ་མཆོག་ཏུ་སེམས་བསྐྱེད། དེ་ནས་རང་ཐ་མལ་པའི་ཐུགས་ཀར་པད་མ་དང་ཉི་མའི་སྟེང་དུ་ཡི་གེ་བཾ་གཅིག་བསམ༑ བཾ་དེ་ལས་འོད་ཟེར་སྤྲོས། ཨུ་རྒྱན་གྱི་གནས་ནས་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པའི་དཀྱིལ་འཁོར་གྱི་ལྷ་ཚོགས་སྤྱན་དྲངས་ལ། དེ་ལ་ལུས་ངག་ཡིད་གསུམ་གུས་པས་ཕྱག་འཚལ། ལུས་གུས་པས་ཡན་ལག་ལྔ་ས་ལ་གཏུགས། ངག་གུས་པས་རྡོ་རྗེ་རྣལ་འབྱོར་མ་ལ་ཕྱག་འཚལ་ལོ་ཞེས་བརྗོད། སེམས་དང་བས་ལུས་རྡུལ་སྙེད་དུ་སྤྲུལ་ནས་ཕྱག་འཚལ་བར་བསྒོམ། དེ་ནས་ཕྱི་ནང་གསང་གསུམ་གྱི་མཆོད་པ་ནི། ཕྱིའི་མཆོད་པ་མེ་ཏོག་ལ་སོགས་པས་མཆོད། ནང་གི་མཆོད་པ་རང་གི་སྙིང་ག་ནས་རྩ་བའི་ལྷ་མོ་བཞིས་ཤ་ལྔ་བདུད་རྩི་ལྔས་མཆོད། གསང་བའི་མཆོད་པ། དེ་བཞིས་འཁྱུད་པའི་ཚུལ་
1-2-185b
གྱིས་ཐུགས་ཀར་ཐིམ་པར་བསམ། དེ་ནས་བཤགས་པ་བྱ་བ་ནི། ཚེ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ། ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བའི་ལས་ཅི་བགྱིས་པ་ཐམས་ཅད་བཤགས༑ གཞན་གྱི་དགེ་བའི་རྩ་བ་ཐམས་ཅད་ལ་རྗེས་སུ་ཡི་རང་། སངས་རྒྱས་འགའ་ཞིག་ཆོས་མི་གསུང་བ་ལ་སེམས་ཅན་གྱི་དོན་དུ་ཆོས་ཀྱི་འཁོར་ལོ་བསྐོར་བར་བསྐུལ་སངས་རྒྱས་འགའ་ཞིག་མྱ་ངན་ལས་འདའ་བར་བཞེད་པ་ལ། མྱ་ངན་ལས་མི་འདའ་བའི་གསོལ་བ་གདབ། དེ་ལས་བྱུང་བའི་དགེ་བའི་རྩ་བ་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཆེན་པོར་བསྔོ། དེ་ནས་སྐྱབས་འགྲོ་སེམས་བསྐྱེད་མདོར་བསྡུས་བྱས་ལ། བཛྲ་མུཿ ལྷ་གཤེགས་སུ་གསོལ། དེ་ནས་དགེ་བའི་རྩ་བ་བྱང་ཆུབ་ཏུ་བསྔོ། དེ་ཡན་ཆད་རྒྱུ་བསོད་ནམས་ཀྱི་ཚོགས་བསགས་པའོ། །དེ་ནས་འབྲས་བུ་ཡེ་ཤེས་ཀྱི་ཚོགས་བསག་པ་ནི། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཿསྭ་བྷཱ་ཝ་བི་ཤུདྡྷོ ྅ཧཾ། ཞེས་བརྗོད་པས་གཟུང་བ་དང་འཛིན་པ་ཐམས་ཅད་སྟོང་པ་ཉིད་དུ་བསམ། སྟོང་པའི་ངང་ལས་ཡི་གེ་བྷྲུྃ་ལས་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པ། དུར་ཁྲོད་བརྒྱད་ཀྱིས་བསྐོར་བ། དེའི་ནང་དུ་ཆོས་འབྱུང་གཉིས་བརྩེགས་གཅིག་བསམ། ཆོས་འབྱུང་གི་གནང་ན་པད་ཉིའི་སྟེང་དུ་རོ་གཅིག་བསམ། རོའི་སྟེང་དུ་ཡི་གེ་བོ་གཅིག་བསམ། བཾ་ལས་འོད་
1-2-186a
༄༅། །ཟེར་འཕྲོས། སེམས་ཅན་ལ་ཕོག །སེམས་ཅན་གྱི་སྡིག་སྒྲིབ་སྦྱངས། འོད་ཟེར་ཚུར་འདུས་བཾ་ལ་ཐིམ། བཾ་འོད་དུ་ཞུ་བ་ལས་བདག་ཉིད་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་མ། སྐུ་མདོག་དམར་བ། ཞལ་གཡས་སེར་བ། གཡོན་ལྗང་བ། རྒྱབ་སྔོ་བའོ། །སྤྱན་གསུམ་གསུམ་དང་ལྡན་པ། མཆེ་བ་གཙིགས་པ། ཐོད་པ་སྐམ་པོ་ལྔས་དབུ་ལ་བརྒྱན་པ། ཐོད་རློན་ལྔ་བཅུ་རྩ་གཅིག་གི་དོ་ཤལ་བ; ཅན་༑ རུས་པའི་རྒྱན་གྱིས་བརྒྱན་པ། ཕྱག་དང་པོ་གཉིས་ཀྱིས་གཡས་གྲི་གུག་དང་གཡོན་ཐོད་པ་བསྣམས་པ། དེའི་འོག་མ་གཉིས་ཀྱིས་མི་ལྤགས་ཀྱི་གཡང་གཞི་འཛིན་པ། གཡས་ཀྱི་གསུམ་པ་ན་ཊ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་རྩེ་གསུམ་མོ། །གཡོན་གྱི་གསུམ་པ་ན་ཀ་པཱ་ལ། བཞི་པ་ན་རྡོ་རྗེ་ཞགས་པ། ལྔ་པ་ན་ཁ་ཊྭཱཾ་ག །དྲུག་པ་ན་ཚངས་པའི་མགོ་བོ་བསྣམས་པའོ། །རོ་གདན་ལ་ཞབས་བརྐྱང་བསྐུམ་དུ་བཞུགས་པ། དེའི་ཡབ་ཞལ་གཅིག་ཕྱག་གཉིས་པ། སྐུ་མདོག་སྔོན་པོ་གཡས་རྡོ་རྗེ། གཡོན་དྲིལ་བུ་བསྣམས་པ། རུས་པའི་རྒྱན་ཅན་སྟག་ལྤགས་ཀྱིས་སྨད་དཀྲིས་ཤིང་གཡས་བརྐྱང་གཡོན་བསྐུམ་པའོ། །ཡབ་མེད་ན་ཡུམ་གར་ཐབས་ཅན་མེ་དཔུང་གི་ནང་དུ་གསལ་བར་བསྒོམ་མོ། །དེ་ནས་རང་གི་སྙིང་གར་པད་ཉིའི་སྟེང་དུ་བོ་བསམ། བཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རང་
1-2-186b
དང་འདྲ་བའི་རྡོ་རྗེ་རྣལ་འབྱོར་མ་མདུན་གྱི་ནམ་མཁའ་ལ་སྤྱན་དྲངས་ལ་ཕྱི་ནང་གསང་གསུམ་གྱིས་མཆོད། ངག་ཏུ། ཛ་ཧཱུྃ་བྃ་ཧོ༔ བྱས་པས་བདག་གི་སྤྱི་བོ་ནས་མར་ཐིམ་པས་བདག་དང་གཉིས་སུ་མེད་པ གྱུར་པར་བསམ། དེ་ནས་སྐུ་གསུང་ཐུགས་བྱིན་གྱིས་བརླབ་པ་ནི། སྤྱི་བོར་ཟླ་བའི་སྟེང་དུ་ཨོཾ་དཀར་པོ། མགྲིན་པར་ཉི་མའི་སྟེང་དུ་ཨཱཿདམར་པོ། ཐུགས་དཀར་པད་མའི་སྟེང་དུ་ཧཱུྃ་སྔོན་པོ་བསམ། དེ་ནས་རང་གི་ཐུགས་ཀའི་བཾ་ལས་འོད་ཟེར་སྤྲོས་པས། རྡོ་རྗེ་རྣལ་འབྱོར་མ་བདུན་གྱི་ནམ་མཁའ་ལ་སྤྱན་དྲངས་ལ། ཕྱག་འཚལ། ཕྱི་ནང་གསང་གསུམ་གྱིས་མཆོད་ལ། ངག་ཏུ། ཛ་ཧཱུྃ་བྃ་ཧོཿབྱས་པས། བདག་གི་སྤྱི་བོ་ནས་མར་ཐིམ་པས་བདག་དང་གཉིས་སུ་མེད་པར་གྱུར་པར་བསམ། དེ་ནས་རང་གི་ཐུགས་ཀའི་བཾ་འོད་འཕྲོས་པས་མདུན་གྱི་ནམ་མཁའ་ལ་སྤྱན་དྲངས་ལ། ཕྱི་ནང་གསང་གསུམ་གྱི་མཆོད་ལ། ཡན་ལག་བདུན་པ་བྱས་ལ་གསོལ་བ་གདབ། དེ་ནས་རྡོ་རྗེ་རྣལ་འབྱོར་མའི་ཐུགས་ཀ་ནས་འདོད་ཡོན་གྱི་ལྷ་མོ་ལྔས་ཀ་པཱ་ལ་བདུད་རྩིས་བཀང་ནས་རང་གི་སྤྱི་བོ་ནས་མར་བླུག་པས། ཨ་བྷི་ཥིཉྩ་ཨ་ཟེར་བས། ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག་ནས། བདུད་རྩི་ལྷག་མ་ཡར་འཁྱིལ་བ་ལས་མི་བསྐྱོད་པས་དབུ་རྒྱན་པར་བསམ་མོ། །དབང་བསྐུར་བའོ། །དེ་ནས་རྫོགས་པའི་རིམ་པ་བསྒོམ་པ་ནི། ཕྱག་རྒྱ་གཉིས་
1-2-187a
༄༅། །ལ་བརྟེན་ནས་བསྒོམ་སྟེ། ལྟེ་བར་ཆོས་འབྱུང་གྲུ་གསུམ་གཉིས་བརྩེགས་ཀྱི་དབུས་སུ་པད་མ་འདབ་བཞིའི་ལྟེ་བར་བཾ་བསམ། རྩིབས་དྲུག་ལ་གོ་ཆའི་ལྷ་མོའི་ས་བོན་བསམ། བཾ་ལས་འོད་ཟེར་སྤྲོས ས་སེམས་ཅན་ལ་ཕོག །སེམས་ཅན་གྱི་སྡིག་སྒྲུབ་སྦྱངས། འོད་ཟེར་ཚུར་འདུས་པཾ་ལ་ཐིམ་པས་རྡོ་རྗེ་རྣལ་འབྱོར་མ་ལྷ་བདུན་གྱི་བཾ་རྐྱང་ཁོ་ན་ཕལ་ཆེར་རོ། །དབབ་དུས་སུ་ཡང་དེའོ། །དཀྱིལ་འཁོར་དུ་བསམ་ལ། དབུས་ཀྱི་གཙོ་མོ་མི་འཁོར་བར་ཆོས་འབྱུང་གཡོན་དུ་འཁོར་བ་ལ་ཤེས་པ་གཏད་ལ་སྟེང་རླུང་མནན་ནོ། །དེ་ནས་ལྷ་མོ་དྲུག་གཙོ་མོ་ལ་ཐིམ་པར་བསམ། གཙོ་མོ་བཾ་དུ་གྱུར་པར་བསམ། བཾ་འོད་དུ་ཞུ། འོད་དེ་རྟ་རྔ་ཙམ་གཅིག་རྩ་དབུ་མའི་ནང་ན་ཡར་ཞུགས་ནས་སྤྱི་བོ་བདེ་བ་ཆེན་པོར་ཐོན་ནས་ཞལ་གསུམ་ལ་ཕོག་པས་ཞལ་གསུམ་པོ་རྔུབས་པའི་ཚུལ་དུ་རྩ་བའི་ཞལ་ལ་བསྡུ། རྩ་བའི་ཞལ་སྐུ་ལ་བསྡུ། སྐུ་འཇའ་ཚོན་ན་བུན་གྱི་ཚུལ་དུ་དེངས་ནས་ཆོས་ཉིད་སྟོང་པའི་ངང་ལ་བློ་བཞག་པས་དྲོད་སྐྱེ། དྲོད་ལ་བརྟེན་ཏེ་བདེ་བ་སྐྱེ། བདེ་བ་ལ་བརྟེན་ཏེ་རྟོག་པ་འགགས་པས། མི་རྟོག་པ་ཤུགས་ལ་སྐྱེ། དེའི་ངང་ལ་ཤེས་པ་མ་བཅོས་པར་བཞག །རྟོག་པ་སྐྱེས་ན། ཆོས་སྐུའི་ངང་ལས་ལོངས་སྤྱོད་རྫོགས་པའི་སྐུ་སྒྱུ་མ་ལྟ་བུ་གོང་བཞིན་བསྒོམས་ནས། སྔགས་བཟླ་བ་ནི། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་
1-2-187b
ཕཊ་ཕཊ་ཕཊ་སྭཱ་ཧཱ། ཞེས་པས་རང་གི་སྙིང་གའི་པད་ཉིའི་སྟེང་གི་བཾ་ལ་གཡོན་བསྐོར་དུ་ཡོད་པ་ལས། ངག་ཏུ་དེ་བཟླས་པའི་ཚེ་ཐུགས་ཀའི་སྔགས་ཕྲེང་ལས་ཡར་ཆད་ནས་བྱུང་། ཞལ་ནས་ལྟེ་བར་ཞུགས། རྩ་དབུ་མའི་ནང་ན་ཡར་སོང་ནས་ཞལ་དུ་འཐོན། དེ་ལྟར་འཁོར་བ་ལ་དམིགས་ནས་མི་སྐྱོའི་བར་དུ་བཟླས་པ་བྱའོ་ཡང་ན་བཾ་ལ་གཡོན་བསྐོར་དུ་བསམ་ལ་བཟླའོ། །ཐུན་མཚམས་སུ་གཏོར་མ་བྱེད་པར་འདོད་པས༑ ཐོད་པའམ་རིན་པོ་ཆེའི་སྣོད་དུ་ཁུར་བ་ཤ་ཆང་བདུད་རྩི་ལ་སོགས་པ་བྱུགས་ལ་རང་གི་མདུན་དུ་བཞག །དེ་ནས་རང་ལྷར་གསལ་བཏབ་ནས། ཨོཾ་སྭ་བྷཱ་ཝ་ཅན་བརྗོད་པས་གཏོར་མ་སྟོང་པ་ཉིད་དུ་བསམ༑ དེའི་ངང་ལས་གཏོར་མའི་འོག་ཏུ་ཡཾ་ལས་རླུང་གི་དཀྱིལ་འཁོར་གཞུ་ལྟ་བུ་བ་དན་གྱིས་མཚན་པར་བསམ། དེའི་སྟེང་དུ་རཾ་ལས་མེའི་དཀྱིལ་འཁོར་ཟུར་གསུམ་པ། ཟུར་གསུམ་དུ་ཀཾ་ལས་ཐོད་པའི་སྒྱེད་པོ། དེའི་སྟེང་དུ་ཨ་ལས་ཀ་པཱ་ལ་དུམ་བུ་གཅིག་པ་རྒྱ་ཆེ་བའི་ནང་དུ། ཤ་ལྔ་བདུད་རྩི་ལྔས་ཁེངས་པར་བསམ། དེའི་སྟེང་དུ་ཟླ་བའི་ཁ་ཆོད་ཡོད་པ། དེའི་སྟེང་དུ་རྡོ་རྗེ་ཁ་ཊྭཱཾ་ག་རྩེ་མོ་ཐུར་དུ་བསྟན་པ། ཐོད་པ་གསུམ་བརྩེགས་ཡོད་པའོ་མ་ཏ་ལ་ཨོཾ། བར་པ་ལ་ཨཱཿ ཡ་ཏ་ལ་ཧཱུྃ་ཡོད་པར་བསམ། དེ་ནས་ཧཱུྃ་ཞེས་བརྗོད་པས། རང་གི་སྣ་བུག་ནས་རླུང་ཧཱུྃ་ལྟ་བུ་བྱུང་པོ་ལས། བ་དན་བསྐྱོད་པ་ལས་རླུང་གཡབས། རླུང་
1-2-188a
༄༅། །གིས་མེ་སྦར། མེས་ཐོད་པ་དྲོས་ནས་རྫས་རྣམས་ཁོལ་བས། མི་གཙང་པ་རྣམས་ཕྱིར་ལུད་ནས་དམར་སེར་སྦྲང་རྩི་ལྟ་བུར་གྱུར་པར་བསམ། ཨོཾ་འོད་དུ་ཞུ་བས་གཏོར་མ་རྒྱ་ཆེན་པོར་བསམ། ཨཱཿའོད་དུ་ཞུ་བས་བདུད་རྩིར་གྱུར་པར་བསམ། ཧཱུྃ་ལས་འོད་ཟེར་སྤྲོས་པས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་བཀུག་ནས་ཁ་ཊྭཱཾ་གའི་སྦུ་གུ་ན་མར་བབ་པར་བསམ། ཨོཾ་ཨཱཿཧཱུྃ། ཞེས་བརྗོད་པས་ཁ་ཊྭཱཾ་ག་དང་ཟླ་བའི་ཁ་ཆོད་འོད་དུ་ཞུ་བས་བདུད་རྩིར་གྱུར་པར་བསམ། མགྲོན་སྤྱན་དྲང་པ་ནི། རང་གི་ཐུགས་ཀའི་བཾ་ལས་འོད་ཟེར་འཕྲོས། ཨུ་རྒྱན་ནས་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པ། དཔའ་མོ་སུམ་བཅུ་སོ་དྲུག་དང་། འཁོར་མཁའ་འགྲོ་མ་བྱེ་བ་དང་བཅས་པ་མདུན་དུ་སྤྱན་དྲངས་ལ། ངག་ཏུ། ཨོཾ་བཛྲ་བཻ་རོ་ཙ་ནཱི་ཡེ། ཨོཾ་ཧྲི་ཧ་ཧ་ཧཱུྃ་ཧཱུྃ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ། རཀྵ་ས། བྷུ་ཏ། པྲེ་ཏ། པི་ཤ་ཙ། ཨུད་མཎྜ། ཨ་པ་སྨ་ར། བཛྲ་ཌཱ་ཀི་ནྱཻ་དྷ་ཡ། ཨེ་དཾ་བ་ལིཾ་གྲྀ་ཧནྟུ། ས་མ་ཡ་རཀྵནྟུ། མཱ་མ་སརྦ་སིདྡྷི་མྨེ་པྲ་ཡཙྪནྟུ། ཡ་ཐཻ་བཾ། ཡ་ཐཻ་ཥྚཾ། བྷུ་ཛ་ཐཱ། པི་བ་ཐཱ། མཱ་ཏི་ཀྲ་མ་ཐཱ། ཛི་གྷྲ་ཐཱ། མཱ་མ་སརྦ་ཀ་ར་ཏ་ཡ་སད་སུ་ཁཾ་བི་ཤུདྡྷ་ཡེ་ས་ཧ་མི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ། ཞེས་ལན་གསུམ་བརྗོད་པས་ལྗགས་རྡོ་རྗེའི་སྦུ་གུ་ཅན་གྱིས་གསོལ་བས་མཉེས་ཤིང་ཚིམ་པར་བསམ། རྐང་པ་བརྒྱད་པས་བསྟོད་པ་བྱ། 
1-2-188b
འདོད་པའི་དོན་ལ་གསོལ་བ་གདབ། ཡི་གེ་བརྒྱ་པ་བརྗོད་ནས་ལྷ་དེ་དག་གཤེགས། གཏོར་མ་གཙང་སར་བསྐྱལ་ལོ། །ཇོ་མོ་ཞལ་བཞི་མའི་སྒྲུབ་ཐབས་རྫོགས་སོ། །ཨྠྀི།། །།
༄། །བྱིན་རླབས་ཀྱི་རིམ་པ།
རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །བཅོམ་ལྡན་མ་ཞལ་བཞི་མའི་སྒོ་ནས་སློབ་མ་ལ་དབང་དང་བྱིན་རླབས་བྱེད་པར་འདོད་ན། གནས་ཁང་གད་དར་ལེགས་པར་བྱས་ལ། བསྙེན་པ་ཅི་རིགས་པར་བསྐྱལ། སྔ་དྲོའི་དུས་སུ་སྔོན་འགྲོའོ་ཆོ་ག་གཞོན་ནུ་མའི་མཆོད་པ་བྱའོ། །མཎྜལ་རྣམ་ལྔ་དང་དྲི་དང་ཆང་གིས་བྱུགས་ལ། དེ་ནས་ཐིག་ལེགས་པར་བཏབ་ལ། རང་གི་གཡོན་ཕྱོགས་སུ་ཆོས་འབྱུང་དམར་པོ་གཉིས་བརྩེགས་དབུས་སུ་བོ་དང་བཅས་པ་བྲི། དེ་ནི་སྔོན་དུ་འགྲོ་བ་གཞོན་ནུ་མའི་མཆོད་པའི་མཎྜལ་ལོ། །དེ་ནས་གཡས་ཕྱོགས་སུ་སིན་དྷུ་རའི་དཀྱིལ་འཁོར་བཅའ་བ་ནི། ཆོས་འབྱུང་དམར་པོ་གཉིས་བརྩེགས་བྲི། དབུས་སུ་རྩིབས་རྣམས་ལ་ནས་ཀྱི་ཚོམ་བུ་བཀོད། དེའི་དབུས་སུ་མ་འཇིའི་སྟེང་དུ་ཀ་པཱ་ལ་ཆང་གིས་བཀང་ལ། མྲྀ་ཏ་བླུགས་ནས་དར་དམར་པོས་ཁ་ཆོད་བྱས་ལ་བཞག །དེའི་སྟེང་དུ་མེ་ལོང་ལ་དྲི་དང་ཆང་གིས་བྱུགས་ཏེ། དར་སེང་པ་ལ་སིན་དྷུ་ར་ཁོད་སྙོམས་པར་བཙགས་ལ། གསེར་གྱི་སྨྱུ་གུས་ཆོས་འབྱུང་གཉིས་བརྩེགས་བྲི། དེའི་དབུས་སུ་པད་མ་འདབ་མ་བཞི་བྲི། དབུས་སུ་བཾ་བྲི། ཤར་གྱི་འདབ་མ་ལ་བཛྲ་ཌཱ་ཀི་ནི་བྲི། ལྷོར་རཏྣ་ཌཱ་
1-2-189a
༄༅། །ཀི་ནི་བྲི། ནུབ་དུ་པདྨ་ཌཱ་ཀི་ནི་བྲི། བྱང་དུ་བི་ཤྭ་ཌཱ་ཀི་ནི་བྲི། དེའི་ཕྱི་རོལ་དུ་སྐུ་གསུང་ཐུགས་ཀྱི་སྔགས་གཡོན་བསྐོར་དུ་བྲི། རྩིབས་དྲུག་གི་ནང་དུ་གོ་ཆའི་ལྷ་མོ་དྲུག་གི་སྔགས་བྲིས་ལ་ཀ་པཱ་ལའི་སྟེང་དུ་བཞུགས། ཐོད་པ་མཚན་ལྡན་གཅིག་གི་ནང་དུ་ཆང་དང་ཨ་མྲྀ་ཏ་བླུག་ལ་རང་གི་མདུན་དུ་བཞག །ཡང་ཐོད་པ་གཅིག་གི་ནང་དུ་ཤ་སྣ་ཚོགས་དང་། སྙིང་སྣ་ཚོགས་ཀྱི་གཏོར་མ་བྱས་ལ་བཞག །གཞན་ཡང་གཏོར་མ་དང་ཚོགས་དང་མཆོད་པ་འབྱོར་ཚད་བཤམ། དེ་ནས་སློབ་མ་ནང་དུ་འོངས་ཏེ། སློབ་དཔོན་ལ་ཕྱག་འཚལ་ནས་གྲལ་བྱེད་དུ་བཅུག་ལ། ལས་འབྲས་དང་། ཐེག་པ་ཆེ་ཆུང་གི་ཁྱད་པར་དང་། སྔགས་ཀྱི་ཐེག་པའི་ཁྱད་པར་དང་། སྐྱབས་འགྲོ་སེམས་བསྐྱེད་རྒྱས་པ་བྱ། དེ་ནས་སློབ་མ་ལ་རྡོ་རྗེ་རྣལ་འབྱོར་མའི་གོ་འཕང་ཐོབ་པར་བྱའོ་སྙམ་དུ་སེམས་ཤིག་བྱས་ལ། སྐབས་འདིར། རྒྱལ་བའི་སྐུ་ལ་ཉོན་མོངས་མི་མངའ་ཡང་། །ཞེས་པས་དཀོན་མཆོག་སྤྱིའི་མཆོད་པ་ཚར་གཅིག་དབུལ། དེ་ནས་སློབ་དཔོན་གྱིས་བསྐྱེད་རྫོགས་བསྒོམ། བཟླས་པ་ཅི་རིགས་སུ་བྱས། དེ་ནས་མེ་ལོང་གི་པཾ་ལས་འོད་སྤྲོས་སེམས་ཅན་ཐམས་ཅད་ལ་ཕོག་སྡིག་སྒྲིབ་སྦྱངས། འོད་ཟེར་ཚུར་འདུས་པཾ་ལ་ཐིམ། བཾ་འོད་དུ་ཞུ་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པ་སྐུ་མདོག་དམར་བ་སྤྱན་གསུམ་གསུམ་དང་ལྡན་པ། མཆེ་བ་
1-2-189b
གཙིགས་པ། ཐོད་པ་སྐམ་པོ་ལྔས་དབུ་བརྒྱན་པ། ཐོད་རློན་ལྔ་བཅུའི་དོ་ཤལ་ཅན། རུས་པའི་རྒྱན་གྱིས་བརྒྱན་པ། རོའི་གདན་ལ་བརྐྱང་བསྐུམ་དུ་བཞུགས་པའི་གཙོ་མོ་དང་ཕྱག་མཚན་གོང་ལྟར་རོ། །འཁོར་མཁའ་འགྲོ་མ་བཞི་དང་། གོ་ཆའི་ལྷ་མོ་དྲུག་གིས་བསྐོར་བའི་ལྷ་བཅུ་གཅིག་གི་དཀྱིལ་འཁོར་བསྐྱེད་ལ། མཆོད་པ་དང་བསྟོད་པ་རྒྱས་པ་བྱ། དེ་ནས་གཙོ་མོའི་ཐུགས་ཀའི་བཾ་ལས་འོད་ཟེར་སྤྲོས་པས། ཨུ་རྒྱན་ནས་རྡོ་རྗེ་རྣལ་འབྱོར་མ་དེ་དང་འདྲ་བ་གཅིག་སྤྱན་དྲངས་ལ། ཕྱི་ནང་གསང་གསུམ་གྱིས་མཆོད་ལ་བསྟིམ། དེ་ནས་མེ་ལོང་གི་ལྷ་ལ་དམིགས་ལ་སྙིང་པོ་བརྒྱ་ཙམ་བཟླ། དེ་ནས་ཆང་བྱིན་གྱིས་བརླབ་པ་ནི། ཀ་པཱ་ལ་ལག་པ་གཡས་པའི་མཐིལ་དུ་བཞག །ལག་པ་གཡོན་པ་བཀབ་ལ། ཆང་ནང་དུ་ཨོཾ་ཨཱཿཧཱུྃ་བསམ་ལ། དེ་རིམ་གྱིས་ཞུ་བས་བདུད་རྩིར་གྱུར་པར་བསམ། དེ་ནས་སྤྱི་བོར་བླ་མ་བསམ་ལ། གུ་རུ་ཨ་མྲྀ་ཏ་ཁཱ་ཧི། ཞེས་བརྗོད་ལ་བླ་མ་མཆོད། དེ་ནས་མེ་ལོང་གི་ལྷ་ལ་མཆོད། ཚོགས་ལ་གཏོར་བས་བདུད་རྩིར་གྱུར་པར་བསམ། གནས་ཁང་ལ་གཏོར་བས་མཁའ་འགྲོ་མའི་ར་བ་དང་དྲ་བར་གྱུར་པར་བསམ། རང་ལ་གཏོར ར་བས་མཁའ་འགྲོ་མས་བ་སྤུའི་བུ་ག་ཐམས་ཅད་བལྟམས་པར་བསམ། དེ་ནས་དཀྱིལ་འཁོར་གྱི་ལྷ་ཚོགས་ལ་མཆོད་པ་རྣམ་ལྔ་དབུལ། དེ་ནས་བྱིན་རླབས་དབབ་པ་ནི། སློབ་དཔོན་གྱིས། སློབ་མ་ལ་
1-2-190a
༄༅། །ཕྱག་གསུམ་འཚལ་དུ་བཅུག་ལ། མཎྜལ་ཕུལ་ལ་གསོལ་བ་གདབ་པ་ནི། བླ་མ་རྗེ་བཙུན་པ་དང་བཅོམ་ལྡན་འདས་རྡོ་རྗེ་རྣལ་འབྱོར་མ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་ལ། བཅོམ་ལྡན་འདས་རྡོ་རྗེ་རྣལ་འབྱོར་མའི་དཀྱིལ་འཁོར་གྱི་ལྷ་ཚོགས་ཀྱིས་སྐུ་གསུམ་ཐུགས་ཀྱིས་བྱིན་གྱིས་བརླབ་པར་མཛད་དུ་གསོལ། ཅེས་ལན་གསུམ་གསོལ་བ་གདབ་ལ་ཙོག་བུར་བསྡད། དེ་ནས་སློབ་མའི་ལྟེ་བར་ཆོས་འབྱུང་གཉིས་བརྩེགས་ཀྱི་ནང་དུ་གཙོ་མོ་བསྒོམ། རྩིབས་དྲུག་ལ་གོ་ཆའི་ལྷ་མོ་དྲུག་བསྐྱེད། གཙོ་མོ་མི་འཁོར་བར་གཞན་རྣམས་ཆོས་འབྱུང་དང་བཅས་པ་གཡས་སུ་འཁོར་བར་བསམ་དུ་གཞུག །དེ་ནས་སློབ་དཔོན་གྱིས་སིན་དྷུ་རའི་དཀྱིལ་འཁོར་གྱི་སྟེང་གི་གཙོ་མོའི་སྤྱི་བོར་བླ་མ་བསམ། བླ་མ་ཡང་འོད་དུ་ཞུ་ནས་གཙོ་མོ་ལ་ཐིམ་པར་བསམ། རྣལ་འབྱོར་མའི་ཐུགས་ཀ་ནས་འོད་ཟེར་རྣམ་པ་ལྔ་བྱུང་པས་སློབ་མའི་སྤྱི་བོ་ནས་མར་ཐིམ་པར་བསམ་ལ། སྔགས་བཟླས་ཤིང་ཅང་ཏེ་དང་དྲིལ་བུ་སྒྲོལ། སྤོས་དང་གུ་གུལ་གྱི་དུད་པས་བདུག །སྐུ་ལ་བབ་ན་འཕར་འདར། གསུང་ལ་བབས་ན་{སཾསྐྲི་}[*]སིངྐྲི་ཏའི་སྐད་ལ་སོགས་པ་འབྱུང་། ཐུགས་ལ་བབས་ན་མི་རྟོག་པ་སྐྱེ། དེ་ནས་དབང་བཞི་ངོ་སྤྲད་པ་ནི། དེ་ལྟར་ཆོས་འབྱུང་གཉིས་བརྩེགས་ཀྱི་ནང་དུ་ལྷ་བདུན་གྱི་དཀྱིལ་འཁོར་བསྒོམ་པར་བྱས་པས་ནི་དྲོད་སྐྱེས་
1-2-190b
ལྷ་དང་ངོ་སྤྲད་པས་བུམ་པའི་དབང་ཐོབ་པ་ཡིན། ལྷ་མོ་དྲུག་གཙོ་མོ་ལ་ཐིམ། གཙོ་མོ་བཾ་དུ་གྱུར། བཾ་ཡང་འོད་དུ་ཞུ། འོད་རྩ་དབུ་མའི་ནང་ན་ཡར་ཞུགས་ནས་སྤྱི་བོར་ཐོན་པ་ནི་གསང་དབང་ཐོབ་བདེ་བ་སྐྱེས། སྤྱི་བོའི་འོད་ཀྱིས་ཞལ་གསུམ་པོ་ལ་ཕོག་ནས། ཞལ་གསུམ་པོ་རྔུབས་པའི་ཚུལ་གྱིས་རྩ་ཞལ་ལ་ཐིམ། དེས་ཤེས་རབ་ཡེ་ཤེས་ཀྱི་དབང་ཐོབ་པ་ཡིན་མི་རྟོག་པ་སྐྱེས། རྩ་ཞལ་ཡང་སྐུ་ལ་ཐིམ། སྐུ་ཡང་འོད་དུ་ཞུ། འོད་འཇའ་ཚོན་ནམ། ན་བུན་གྱི་ཚུལ་དུ་དེངས་ནས་ཆོས་ཉིད་སྟོང་པའི་ངང་ལ་བློ་དར་ཅིག་བཞག་པ་ནི་དབང་བཞི་པ་ཐོབ་པ་ཟུང་འཇུག་གི་རྟོག་པ་སྐྱེས་ཡིན་པ། དེས་ནི་སྡིག་པ་མ་དག་པ་དང་། དབང་མ་ཐོབ་པ་ཐོབ་པ་དང་། ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས་པའི་རྟེན་དུ་གྱུར་པ་ཡིན་ནོ། །དེ་ནས་བཏང་རག་གི་མཆོད་པ་བྱས་ལ། ཡེ་ཤེས་སེམས་དཔའ་གཤེགས་སུ་གསོལ། །དམ་ཚིག་པ་སློབ་མའི་ལྟེ་བའམ༑ སྙིང་གར་བསྡུར་གཞུག །དེ་ནས་སིན་དྷུ་རའི་ཐིག་ལེ་བྱ། ངག་དག་པར་བྱ་བའི་ཕྱིར་བདུད་རྩི་མྱང་བ་བྱ། དེ་ནས་ཚོགས་ལ་ལོངས་སྤྱད། བཤགས་པ་བྱ། ལྷག་མའི་གཏོར་མ་ཨུ་ཙིཥྚས་བསྔོས་ལ་བཏང་༑ ཆོ་ག་ཉམས་ཆགས་བསྐང་བའི་ཕྱིར་ཡི་གེ་བརྒྱ་པ་འདོན། མཆོད་པ་རྣམས་གཤེགས། བྱིན་རླབས་ཀྱི་རིམ་པ་རྫོགས་སོ།། །།
༄། །མཎྜལ་ཡེ་ཤེས་ཀྱི་མཆོད་པ།
རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །སྔོན་འགྲོ་གཞོན་ནུ་མའི་མཆོད་པ་བྱའོ་
1-2-191a
༄༅། །མཎྜལ་ཡེ་ཤེས་ཀྱི་མཆོད་པ་བྱེད་པར་འདོད་པས། གནས་ཁང་རྒྱན་པ་མེ་ལོང་བྱིན་རླབས་དང་འཐུན། དེ་ནས་མཎྜལ་བ་ཡི་རྣམ་ལྔས་བྱུགས། དྲི་དང་ཆང་གིས་བྱུགས་ལ། རེ་ཁ་དཀར་པོས་བཟླུམ་པོར་བསྐོར། དེའི་ནང་དུ་ཆོས་འབྱུང་དམར་པོ་གཉིས་བརྩེགས་བྲི། དབུས་སུ་པད་མ་འདབ་བཞི་བྲི། ལྟེ་བར་བཾ་བྲི། འདབ་མ་བཞི་ལ་ལྷ་མོ་བཞིའི་ས་བོན་བསམ། རྩིབས་དྲུག་ལ་གོ་ཆའི་ལྷ་མོ་དྲུག་གོ་ས་བོན་བསམ། དེ་ནས་ཐོད་པ་མཚན་ལྡན་ཆང་གིས་བཀང་ལ། ཨ་མྲྀ་ཏ་བླུགས་ལ་རང་གི་མདུན་དུ་བཞག །ཡང་ཐོད་པ་གཅིག་གི་ནང་དུ་ཤ་སྣ་ཚོགས་དང་། སྙིང་སྣ་ཚོགས་ཀྱི་གཏོར་མ་གཅིག་བསམ། མཆོད་པ་རྣམ་པ་ལྔ་ལ་སོགས་པ་འབྱོར་ཚད་བཤམ། ཚོགས་དང་གཏོར་མ་འབྱོར་ཚད་བཤམ། དེ་ནས་རང་སྟན་བདེ་བ་ལ་འདུག་ནས་གཞན་གྱི་བྱེད་ན་སྐྱབས་འགྲོ་སེམས་བསྐྱེད་བྱ། སེམས་ཅན་གྱི་དོན་དུ་སེམས་བསྐྱེད་སྔོན་དུ་བཏང་ལ། བསྐྱེད་རྫོགས་གཞུང་བཞིན་དུ་བསྒོམ་བཟླས་བྱ། དེ་ནས་མཎྜལ་གྱི་པཾ་ལས་འོད་ཟེར་འཕྲོས། སེམས་ཅན་ལ་ཕོག་པས་སྡིག་སྒྲིབ་སྦྱངས། འོད་ཟེར་ཚུར་འདུས་པཾ་ལ་ཐིམ། བཾ་འོད་དུ་ཞུ་བ་ལས་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པ། གཞལ་ཡས་ཁང་གདན་དང་བཅས་པ་བསྐྱེད། པད་མ་འདབ་མ་བཞིའི་སྟེང་དུ་མཁའ་འགྲོ་མ་བཞི་བསྐྱེད། རྩིབས་དྲུག་ལ་གོ་ཆའི་ལྷ་མོ་དྲུག་བསྐྱེད། དེ་
1-2-191b
དས་རྡོ་རྗེ་རྣལ་འབྱོར་མའི་ཐུགས་ཀའི་བཾ་ལས་འོད་ཟེར་སྤྲོས། ཨུ་རྒྱན་ནས་རྡོ་རྗེ་རྣལ་འབྱོར་མ་ལྷ་བཅུ་གཅིག་གི་དཀྱིལ་འཁོར་སྤྱན་དྲངས་ལ་བསྟིམ། མཆོད་པ་འབུལ། བསྟོད་པ་བྱ། དེ་ནས་ཆང་བྱིན་རླབས་གོང་ལྟར་བྱས་ནས་བླ་མ་མཆོད། དཀྱིལ་འཁོར་གྱི་ལྷ་ཚོགས་མཆོད། བསྟོད་པ་བྱ། འདོད་པའི་དོན་ལ་གསོལ་བ་གདབ། དེ་ནས་ཡེ་ཤེས་སེམས་དཔའ་གཤེགས། དམ་ཚིག་པ་རང་གི་ལྟེ་བར་བསྡུ། གཏོར་མ་བཏང་༑ ཚོགས་ལ་ལོངས་སྤྱོད། ལྷག་མའི་གཏོར་མ་བཏང་། ཆོ་ག་ལྷག་ཆད་ཁ་བསྐོང་བྱ། མཎྜལ་གཤེགས། མཎྜལ་ཡེ་ཤེས་ཀྱི་མཆོད་པའོ། །ཨྠྀི།། །།
༄། །སིན་དྷུ་ར་སྔགས་ཀྱི་མཆོད་པ།
རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །སིན་དྷུ་ར་སྔགས་ཀྱི་མཆོད་པ་བྱེད་པར་འདོད་པས། འདི་ལྟར་བྱ་སྟེ། གནས་ཁང་གད་དར་ལེགས་པར་བྱས་ལ། མནལ་བ་ཡི་རྣམ་ལྔས་བྱུགས། དེ་ནས་དྲི་དང་ཆང་གིས་བྱུགས་ལ། ཆོས་འབྱུང་དམར་པོ་གཉིས་བརྩེགས་བྲི། དེའི་དབུས་སུ་མ་འཇིའི་ཁར་དར་དམར་པོའི་གདན་བྱས་ལ། དེའི་སྟེང་དུ་མེ་ལོང་གཡའ་དག་པ་བྱས་ལ། དྲི་དང་ཆང་གིས་བྱུགས་ལ། སིན་དྷུ་ར་ཁོད་སྙོམས་པར་བཙགས་ལ། གསེར་གྱི་སྨྱུ་གུས་ཆོས་འབྱུང་གཉིས་བརྩེགས་བྲི། དེའི་དབུས་སུ་པད་མ་འདབ་མ་བཞི་པ་བྲི། དབུས་སུ་བཾ་བྲི། ཤར་གྱི་འདབ་མ་ལ་བཛྲ་ཌཱ་ཀི་ནི་བྲི། ལྷོར་རཏྣ་ཊཱ་ཀི་ནི་བྲི། ནུབ་ཏུ་པདྨ་ཊཱ་ཀི་ནི་བྲི། བྱང་དུ་བི་ཤྭ་ཌཱ་ཀི་ནི་བྲི། 
1-2-192a
༄༅། ད་ལ་གོ་ཆའི་ལྷ་མོ་དྲུག་གི་ས་བོན་བཀོད་ལ། མ་འཇིའི་སྟེང་དུ་བཞུགས་སུ་གསོལ། དེ་ནས་མཆོད་པ་རྣམ་པ་ལྔ་ལ་སོགས་པ་འབྱོར་ཚད་བཤམ། ཐོད་པ་མཚན་ལྡན་གྱི་ནང་དུ་ཆང་ལ་བདུད་རྩིའི་རིལ་བུ་བཅུག་ལ་རང་གི་མདུན་དུ་བཞག །ཡང་ཐོད་པ་གཅིག་གི་ནང་དུ་ཤ་སྣ་ཚོགས་དང་། སྙིང་སྣ་ཚོགས་ཀྱི་གཏོར་མ་གཅིག་བཤམ། དེ་ནས་རང་སྟན་བདེ་བ་ལ་འདུག་ནས། སེམས་ཅན་གྱི་དོན་དུ་སེམས་བསྐྱེད། བསྐྱེད་རྫོགས་བསྒོམ། བཟླས་པ་བྱ། དེ་ནས་མེ་ལོང་གི་བཾ་ལས་འོད་ཟེར་འཕྲོས་སེམས་ཅན་ཐམས་ཅད་ལ་ཕོག །སྡིག་སྒྲིབ་སྦྱངས། ཚུར་འདུས་བཾ་ལ་ཐིམ། བཾ་འོད་དུ་ཞུ། རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་མར་བསྐྱེད། པདྨའི་འདབ་མའི་ཡི་གེ་བཞི་ལས་མཁའ་འགྲོ་མ་བཞི་བསྐྱེད། རྩིབས་དྲུག་གི་ས་བོན་ལས་གོ་ཆའི་ལྷ་མོ་དྲུག་པོ་དང་དུས་མཉམ་དུ་བསྐྱེད། དེ་ནས་རྡོ་རྗེ་རྣལ་འབྱོར་མའི་ཐུགས་ཀའི་བཾ་ལས་འོད་ཟེར་སྤྲོས་པས། ཨུ་རྒྱན་ནས་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པ་ལྷ་བཅུ་གཅིག་གི་དཀྱིལ་འཁོར་སྤྱན་དྲངས་ལ། མཆོད་བསྟོད་བྱས་ནས་དེ་ལ་བསྟིམ། དེ་ནས་བསྙེན་པ་བསྐྱེལ། དཀྱིལ་འཁོར་གྱི་ལྷ་ཚོགས་ལ་མཆོད་པ་རྣམ་པ་ལྔ་ལ་སོགས་པས་མཆོད། བསྟོད་པ་བྱ། གསོལ་བ་གདབ། དེ་ནས་ཡེ་ཤེས་སེམས་དཔའ་གཤེགས། དམ་ཚིག་པ་རང་གི་ལྟེ་བར་བསྡུ། 
1-2-192b
དེ་ནས་གཏོར་མ་བཏང་། ཚོགས་ལ་ལོངས་སྤྱད། ལྷག་མའི་གཏོར་མ་བཏང་། ཆོ་ག་ལྷག་ཆད་ཁ་བསྐང་། མཎྜལ་གཤེགས། སིན་དྷུ་ར་སྔགས་ཀྱི་མཆོད་པ་རྫོགས་སོ།། །།
༄། །གཞོན་ནུ་མ་རྟེན་གྱི་མཆོད་པ།
རྡོ་རྗེ་རྣལ་འབྱོར་མ་ལ་ཕྱག་འཚལ་ལོ༑ ༑གཞོན་ནུ་མ་རྟེན་གྱི་མཆོད་པ་བྱེད་པར་འདོད་པས། གནས་ཁང་ལེགས་པར་བརྒྱན། དེ་ནས་རང་གི་གཡོན་ཕྱོགས་སུ་མཎྜལ་བ་ཡི་རྣམ་ལྔས་བྱུགས། དྲི་དང་ཆང་གིས་བྱུགས་ལ་ཆོས་འབྱུང་དམར་པོ་གཉིས་བརྩེགས་བྲི། ཐོད་པ་མཚན་ལྡན་གྱི་ནང་དུ་ཆང་བླུག་ལ། བདུད་རྩི་རིལ་བུ་བཏབ། དེ་ནས་རང་གི་མདུན་དུ་བཞག །ཡང་ཐོད་པ་གཅིག་གི་ནང་དུ་ཤ་སྣ་ཚོགས་དང་། སྙིང་སྣ་ཚོགས་དང་། གཏོར་མ་གཅིག་བཤམ། མཆོད་པ་རྣམ་པ་ལྔ་ལ་སོགས་པ་འབྱོར་ཚད་བཤམ། ཚོགས་འབྱོར་ཚད་བཤམ། དེ་ནས་བུ་མོ་ལོ་བརྒྱད་ནས་བཅུ་དྲུག་ཚུན་ལོན་པ། གྲོང་པའི་ཆོས་ཀྱིས་མ་གོས་པ་གཅིག་བོས་ལ། གོས་དམར་པོ་བསྐོན། སིན་དྷུ་རའི་ཐིག་ལེ་བྱ། རྒྱན་གདགས། མཎྜལ་སྟེང་དུ་བཞག །དེ་ནས་བུ་མོ་རྡོ་རྗེ་མར་བསྐྱེད་ལ། ཨུ་རྒྱན་ནས་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་མ་གཅིག་སྤྱན་དྲངས་ལ་དེ་ལ་བསྟིམ༑ མཆོད་པ་རྣམ་པ་ལྔ་ལ་སོགས་པ་དབུལ། ཆང་བྱིན་རླབས་བྱས་ལ་མཆོད། བསྟོད་པ་བྱ། དེ་ནས་ཡེ་ཤེས་པ་གཤེགས། བུ་མོ་སྣོད་དུ་རུང་པ་ཡིན་ན་སར་བཞག །སྣོད་དུ་མི་རུང་ན་བཟའ་བཏུང་གིས་
1-2-193a
༄༅། །ཚིམ་པར་བྱས་ལ་རང་གི་ཁྱིམ་དུ་བཏང་ངོ་། །གཞོན་ནུ་མ་མ་འཛོམ་ན་ཆོས་འབྱུང་གི་ལྟེ་བར་བཾ་གཅིག་བྲི། རང་ཡི་དམ་ལྷར་བསྒོམ། བཟླས་པ་བྱ། དེ་ནས་དཀྱིལ་འཁོར་གྱི་བཾ་ལས་འོད་ཟེར་འཕྲོས༑ སེམས་ཅན་ལ་ཕོག །སྡིག་སྒྲིབ་དག །འོད་ཚུར་འདུས་བཾ་ལ་ཐིམ། བཾ་འོད་དུ་ཞུ། རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པར་བསྐྱེད། རྡོ་རྗེ་རྣལ་འབྱོར་མའི་ཐུགས་ཀའི་བམ་ལས་འོད་ཟེར་འཕྲོས༑ ཨུ་རྒྱན་ནས་རྡོ་རྗེ་རྣལ་འབྱོར་མ་དེ་དང་འདྲ་བ་གཅིག་སྤྱན་དྲངས་ལ་དེ་ལ་བསྟིམ། དེ་ནས་མཆོད་པ་ལྔ་ལ་སོགས་པ་འབུལ། འདོད་པའི་དོན་ལ་གསོལ་བ་གདབ། དེ་ནས་ཡེ་ཤེས་པ་གཤེགས། དམ་ཚིག་པ་རང་གི་ལྟེ་བར་བསྡུ། གཏོར་མ་བཏང་། ཚོགས་ལ་ལོངས་སྤྱད། ལྷག་གཏོར་བ་དང་། ཆོ་ག་ལྷག་ཆད་ཁ་བསྐང་། མཎྜལ་གཤེགས། གཞོན་ནུ་མ་རྟེན་གྱི་མཆོད་པ་འདི། དབང་བསྐུར་བ་དང་། མཎྜལ་ཡེ་ཤེས་ཀྱི་མཆོད་པ་དང་། སིན་དྷུ་ར་སྔགས་ཀྱི་མཆོད་པ་དང་། རྒྱལ་པོ་དབང་དུ་བྱ་བ་ཀུན་གྱི་སྔོན་དུ་འགྲོ་བ་ཡིན་གསུང་། ཨྠྀི།། །།
༄། །རྒྱལ་པོ་དབང་དུ་བྱ་བའི་ཆོ་ག
རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །རྒྱལ་པོ་དབང་དུ་བྱ་བར་འདོད་པས་འདི་ལྟར་བྱ་སྟེ། གནས་ཁང་ཡིད་འཇུག་པ་ལ་སོགས་པའི་སར། དང་པོ་མཎྜལ་བ་ཡི་རྣམ་ལྔས་བྱུགས། དྲི་དང་ཆང་གིས་བྱུགས། དེ་ནས་ཆོས་འབྱུང་དམར་པོ་གཉིས་བརྩེགས་བྲི། དེའི་དབུས་པདྨ་འདབ་
1-2-193b
མ་བཞི་བྲི། ལྟེ་བར་བཾ་བྲི། པདྨའི་འདབ་མ་བཞི་ལ་ཤར་དུ་བཛྲ་ཌཱ་ཀི་ནཱི་བྲི། ལྷོར་རཏྣ་ཌཱ་ཀི་ནཱི་བྲི། ནུབ་ཏུ་པདྨ་ཌཱ་ཀི་ནི་བྲི། བྱང་དུ་བི་ཤྭ་ཌཱ་ཀི་ནི་བྲི། དེ་ནས་ཐོད་པ་མཚན་ལྡན་ཆང་གིས་བཀང་ལ། བདུད་རྩི་རིལ་བུ་བཅུག་ལ་རང་གི་མདུན་དུ་བཞག །ཡང་ཐོད་པ་གཅིག་གི་ནང་དུ་ཤ་སྣ་ཚོགས་དང་། སྙིང་སྣ་ཚོགས་ཀྱི་གཏོར་མ་གཅིག་བཤམ། གཞན་ཡང་མཆོད་པ་རྣམ་པ་ལྔ་ལ་སོགས་པ་འབྱོར་ཚད་བཤམ། དེ་ནས་རང་བྱང་ཆུབ་མཆོག་ཏུ་སེམས་བསྐྱེད། བསྐྱེད་རྫོགས་བསྒོམ། བཟླས་པ་བྱ། དེ་ནས་མཎྜལ་གྱི་བཾ་ལས་འོད་ཟེར་སྤྲོས། སེམས་ཅན་ཐམས་ཅད་ལ་ཕོག །སྡིག་སྒྲིབ་སྦྱངས། འོད་ཟེར་ཚུར་འདུས་བཾ་ལ་ཐིམ༑ བཾ་འོད་དུ་ཞུ་བ་ལས་རྡོ་རྗེ་རྣལ་འབྱོར་མ་ཞལ་བཞི་ཕྱག་བཅུ་གཉིས་པ་ལྷ་ལྔའི་དཀྱིལ་འཁོར་དུ་བསྐྱེད། དེ་ནས་རྡོ་རྗེ་རྣལ་འབྱོར་མའི་ཐུགས་ཀའི་བཾ་ལས་འོད་ཟེར་སྤྲོས། ཨུ་རྒྱན་ནས་རྡོ་རྗེ་རྣལ་འབྱོར་མ་དེ་དང་འདྲ་བ་གཅིག་སྤྱན་དྲངས་ལ་བསྟིམ། དེ་ནས་ཆང་བྱིན་གྱིས་བརླབ། མཆོད་པ་འབུལ། བསྟོད་པ་བྱས་ལ། རྡོ་རྗེ་རྣལ་འབྱོར་མའི་ཐུགས་ཀ་ནས་རྣལ་འབྱོར་མ་སྐུ་མདོག་ནག་མོ་ཕག་ཞལ་ཅན་གཅིག་གིས་གྲི་གུག་ཐོགས་ནས། བསྒྲུབ་བྱའི་སྙིང་ལ་བཟུང་ནས་རང་གི་མདུན་དུ་བཀུག་པར་བསམ། རང་གིས་ངག་ཏུ། ཨོཾ་ཨཱཿབཻ་རོ་ཙ་ནཱི་ཡེ་བཛྲ་བ་རཱ་ཧི། ཆེ་གེ་མོ་ཨཱ་བེ་ཤ་ཡ་ཨ་ཨ། ཞེས་པའི་སྔགས་བརྒྱ་རྩ་
1-2-194a
༄༅། །བརྒྱད་ལ་སོགས་པ་བཟླས། དང་པོ་རང་གི་བཾ་ལས་འོད་གྲི་གུག་གི་དབྱིབས་ཅན་སྤྲོས་ནས་མདུན་དུ་བཀུག་ལ་བཟླས་པ་བྱ། དེས་མ་འདུས་ན་གོང་ལྟར་རོ། །དེ་ནས་དཀྱིལ་འཁོར་གྱི་ལྷ་ཚོགས་ལ་མཆོད་པ་འབུལ། བསྟོད་པ་བྱ། ཡེ་ཤེས་སེམས་དཔའ་གཤེགས། དམ་ཚིག་པ་རང་གི་ལྟེ་བར་བསྡུ། གཏོར་མ་བཏང་། ཚོགས་ལ་ལོངས་སྤྱད། ལྷག་གཏོར་བཏང་། མཎྜལ་གཤེགས། ཆོ་ག་ལྷག་ཆད་ཁ་བསྐང་༑ རྒྱལ་པོ་དབང་དུ་བྱ་བའི་ཆོ་ག་རྫོགས་སོ། །ཨྠྀི།། །།
༄། །ཇོ་མོ་ཞལ་བཞི་མའི་སྒྲུབ་ཐབས་ལས་ཚོགས་དང་བཅས་པ།
རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །བཟླས་པ་ལ་བརྟེན་ནས་སྡིག་པ་སྦྱང་བར་འདོད་པས། སེམས་བསྐྱེད་སྔོན་དུ་བཏང་ལ། རང་ཐ་མལ་པའི་སྙིང་གར་པད་ཉིའི་སྟེང་དུ་ཡི་གེ་བཾ་གཅིག་བསམ། བཾ་ལས་འོད་ཟེར་སྤྲོས། རང་གི་མདུན་དུ་ཆོས་འབྱུང་གཅིག་བསམ། དེའི་དབུས་སུ་པདྨ་འདབ་མ་བཞི་བསམ། དེའི་ལྟེ་བར་བཾ་བསམ། བཾ་ལས་འོད་ཟེར་སྤྲོས་སེམས་ཅན་ལ་ཕོག །སེམས་ཅན་གྱི་སྡིག་སྒྲིབ་སྦྱངས། འོད་ཟེར་ཚུར་འདུས་བཾ་ལ་ཐིམ། བཾ་འོད་དུ་ཞུ་ནས་རྡོ་རྗེ་རྣལ་འབྱོར་མར་གྱུར་པར་བསམ། རྡོ་རྗེ་རྣལ་འབྱོར་མའི་ཐུགས་ཀའི་བཾ་ལས་འོད་ཟེར་སྤྲོས་པས་རང་ལ་ཕོག །རང་གི་སྡིག་སྒྲིབ་སྦྱངས། རང་རྡོ་རྗེ་རྣལ་འབྱོར་མར་གྱུར་པར་བསམ། རྡོ་རྗེ་རྣལ་འབྱོར་མའི་རང་གི་ཐུགས་ཀའི་བཾ་ལས་འོད་ཟེར་འཕྲོས་སེམས་ཅན་ལ་ཕོག །སེམས་ཅན་གྱི་སྡིག་
1-2-194b
སྒྲིབ་སྦྱངས། འོད་ཟེར་ཚུར་འདུས་རང་ལ་ཐིམ་པར་བསམ། དེ་ལྟར་ཡང་དང་ཡང་དུ་བཟླས་པ་བྱ་ཞིང་སྡིག་པ་བཤགས་སོ། །བཟླས་པ་ལ་བརྟེན་ཏེ་སྡིག་པ་བཤགས་པའོ། །དེ་ལྟར་འདི་བཀོད་བསོད་ནམས་ཀྱི༑ ༑བླ་མ་རྡོ་རྗེ་རྣལ་འབྱོར་མས། །བདག་སོགས་བྱིན་གྱིས་བརླབས་གྱུར་ནས། །འགྲོ་རྣམས་སངས་རྒྱས་ཐོབ་པར་ཤོག །ཇོ་མོ་ཞལ་བཞི་མའི་སྒྲུབ་ཐབས་ལས་ཚོགས་དང་བཅས་པ་རྫོགས་སོ།། །།
༄། །ཁྱད་པར་ཅན་གྱི་ཆོས།
གུ་རུ་ན་མོ། བླ་མ་རིན་པོ་ཆེ་སྟོད་ལུང་གི་མཚུར་ཕུ་དོ་བོའི་དགོན་པ་ལ་བཞུགས་པའི་དུས་སུ། ཁྱི་ལོའི་དབྱར་དཀྱིལ་གྱི་ནུབ་གཅིག་གི་རྨི་ལམ་ན། མངའ་རིས་ན་ཡ་ཙེ་རྒྱལ་པོ་བྱ་བའི་ཡུལ་གཅིག་ཡོད། དེའི་གཡོན་ངོས་ཀྱི་ལུང་པ་གཅིག་ན་མར་སོང་ཙམ་ན་པུ་རིག་བྱ་བའི་འོག་ན། རྒྱ་གར་མཐའ་འཁོབ་བྷུ་ཏ་ན་ཧི་ཞེས་བྱ་བ། སངས་རྒྱས་བྱོན་མ་མྱོང་པའི་ཡུལ་དེར་ཕྱིན་པ་རྨིས་ཙམ་ན། རྣལ་འབྱོར་བ་དཔོན་གཡོག་གཉིས་དང་ཕྲད། ཁྱེད་སུ་ལགས་ཞུས་པས། ཨིནྡྲ་བོ་དྷི་བྱ་བ་ཡིན་གསུང་། དེར་བླ་མའི་ཐུགས་ལ་རྗེ་བཙུན་མ་ཨུ་རྒྱན་མའི་རྒྱུད་པ་ཞུ་དགོས་སྙམ་ནས་ཞུས་པས། བླ་མ་བཻ་རོ་ལ་ཞུས་པ་དང་ཁྱད་མ་བྱུང་གསུངས། ཡང་གསང་སྔགས་ཟབ་མོའི་ཆོས་གཅིག་ཞུ་བྱས་ནས་གསོལ་བ་བཏབ་པས། རྣལ་འབྱོར་མ་ཞལ་བཞི་ཕྱག་བཅུ་གཉིས་མའི་སྒྲུབ་ཐབས་ལས་ཁ་ཚར་དང་བཅས་པ་འདི་གནང་སྐད། འདི་ཡང་རྒྱུད་གང་ལ་
1-2-195a
༄༅། །བརྟེན་པ་དང་། རྒྱུད་པ་གང་ཡིན་པ་དང་། དགོས་པ་ཅི་ཡོད་པ་དང་གསུམ་མོ། །དེ་ལ་རྒྱུད་ནི། བདེ་མཆོག་ངེས་པར་བརྗོད་པའི་རྒྱུད་བླ་མ་དང་། སྡོམ་པ་རྒྱ་མཚོའི་རྒྱུད་དང་། ཕག་མོ་མངོན་པར་འབྱུང་བའི་རྒྱུད་དང་གསུམ་ལ་བརྟེན་པ་ཡིན་གསུང་། བརྒྱུད་པ་ནི། བཅོམ་ལྡན་འདས་རྡོ་རྗེ་རྣལ་འབྱོར་མས། ཨུ་རྒྱན་པ་ཆེན་པོ་བྱ་བ་ལ་བཤད། དེས་དུར་ཁྲོད་པ་ལ་བཤད། དེས་ཨིནྡྲ་བོ་དྷི་བར་པ་ལ་བཤད༑ དེས་བླ་མ་རིན་པོ་ཆེ་དྷརྨ་ཀཱིརྟི་ལ་རྨི་ལམ་དུ་གསུངས་པའོ། །དགོས་པ་ནི། ཕྱི་རབས་ཀྱི་གང་ཟག་བྱང་ཆུབ་དོན་དུ་གཉེར་བ་རྣམས་ཀྱི་ཆེད་དུ་གསུངས་པའོ། །ཨྠྀི།། །།ཁྱད་པར་ཅན་གྱི་ཆོས་རྫོགས་སོ༑ ༑གུ་ཧྱ། རྗེ་འགྲོ་མགོན་རས་པ། རིན་པོ་ཆེ་པོམ་བྲག་པ། བླ་མ་ཀརྨ་པ་ནས་བརྒྱུད་པའོ།། །།
